6-im millennie AC

7-im millennie AC - 6-im millennie AC - 5-im millennie AC

Mult neolitic culturas in Europa vivet durant ti-ci millennie. Mentionat ci es li culturas Dnieper-Donets, Narva, Ertebølle, e Swifterbant.

Li 6-im millennie AC extende se inter li annus 6000 AC til 5001 AC (ante 8 mill til 7 mill annus). It es ínpossibil a datar evinementes con precision in ti-ci millennie, e omni dates mentionat ci es estimationes precipue basat sur geologic e antropologic analise, o sur datation radiometric. Ti-ci millennie marca li fine del global deglaciation quel sequet li Recent Glacial Maximum e quel causat un augmentation de 60 metres in nivelles oceanic durant un periode de circa 5,000 annus.

Comunités

Li cultura e tecnologie hat ja expandet se del Proxim Ost e ad-in ostic Europa ye 6000 AC. Su developament in li Lontan Ost crescet similmen, e hay plu e plu evidentie pri to tra li millennie in Prehistoric Egiptia e li Lontan Ost. On crede que li population mundal agrandat acutmen, fórsan quadruplicmen, quam resultate del Revolution Neolitic. On estima que vivet circa 40 million persones tra li munde vers li fine de ti-ci millennie, quel crescet til 100 million vers li Medial Bronzin Era.

Li usada de potteríe proxim a Tbilisi es evidentie que on usat vinberes por vineríe c. 5980 AC.

On estima que homes inhabitat Malta por li prim vez in 5900 AC, arivante trans li Mediterran Mare de ambi Europa e Nord-Africa.

Evidentie por caseríe in Polonia data til c. 5500 AC. Li Cultura Zhaobaogou in China comensat c. 5400 AC. Ti cultura trovat se in li nord-ostic parte del land, precipue in li valley del fluvie Luan in Interiori Mongolia e nordic Hebei.

Quar culturas comensant c. 5300 AC esset identificat: li Dnieper-Donets, li Narva (ostic Baltic), li Ertebølle (Dania e nordic Germania) e li Swifterbant (Bass Países). Ti culturas esset ligat per un comun stil de potteríe quel hat difuset se vers li west de Asia e quel on nomina quelcvez li "ceramic Mesolitic", distintibil de un base con un puntu o bosse e bordes levat.

Changes in li ambiente

Li leva del mare quel evenit in li temporan Holocene, comensante c. 10,000 AC, finit se durant li 6-im millennie. Li nivelles del mare hat levat circa 60 metres pro li deglaciation pos li fine del Epoca Glacial. Li contenete de carbon-14 in anelles de árbores c. 5480 AC monstra un abnormal nivelle de activitá solari.

Astronomie e calendares

Li epoca del Calendare bizantin, usat in li Imperie Bizantin e mult landes cristan ortodox, es egal a 1 septembre 5509 AC del Julian proleptic calendare. Secun li zodiac, li 6-im millennie AC sta completmen intra li zodiacal era de Gemini (li Gemelles), c. 6450 AC til c. 4300 AC.