Interlingue-Union
Organisation de Occidental
| Interlingue-Union | |
|---|---|
| Fundation | 1929 |
| Lingue oficial | Interlingue |
| Revúe | Cosmoglotta |
| Págine web oficial | |
Li Interlingue-Union (IU) es li central organisation international, quel propaga Interlingue. Li IU existe desde 1929 e curentmen have su sede in Svissia. Li Union es absolut neutral in li campes politic, religiós e altris. Till 1949 li organisation nominat Occidental-Union
Li scope del IU es li divulgation e utilisation del Lingue International Interlingue.
Li IU es li editori organisation del revúe Cosmoglotta.
Historie
modificarIt havet li Comité Explorativ por li Lingue International Auxiliari[1] e un Occidental-Academie e anc tri organes:
- li Plenum, cargat de electer li Senate, li aprobation del budgetes annual e del bilancies annual, in plu li decisiones pri changeamentes del statute.
- li Senate, de qui li obligation esset li representation ad extern e li controle del execution del decisiones del Plenum.
- li Central Oficie de qui li obligationes esset li execution del decisiones del Plenum e del Senat.
Li statute del Interlingue-Union
modificar- 1. Li international association INTERLINGUE-UNION es li universal organisation (neutral in politica e religion) por propagar e aplicar in scientie e practica li international auxiliari lingue INTERLINGUE (originalmen nominat OCCIDENTAL). It have su sede in li domicilie del secretario del Comité Directiv (C.D.).
- 2. Li oficial lingue del IU es Interlingue, basat sur li principies enunciat per su autor Edgar de Wahl, e in li forme resultant del decisiones del Academie de Interlingue.
- 3. Li IU tira su revenús ex li contributiones del membres, spontan subventiones, donationes e legates.
- 4. Membre del IU posse devenir omni fisic (individual) o juristic (colectiv) person quel aproba li scopes e li eforties del IU e obliga se payar li membral contributiones.
- 5. Li membres posse organisar se in federation landal o inter landal quam membres colectiv. Ti federationes es autonom in li gestion del aferes, ma obliga se a payar por chascun membre li contribution individual debit al IU e quel es fixat per li C.D.
- 6. Li membres del IU have li jure partiprender in omni votationes arangeat per li C.D., e esser electet quam functionarios del IU.
Organes del IU
- 7. Li Comité directiv (C.D.) es electet per votation inter omni membres del IU. It consiste ex un presidente, un secretario, un vice-secretario e admaxim 4 altri membres. It es li executiv organ del IU e quam tal gere omni aferes administrativ de ti-ci. Li colaboration del membres es fixat per un special regulament. Lor mandate es limitat a 4 annus e ili es reelectibil.
- 8. Li oficial organ del IU es COSMOGLOTTA. Li redactor e li administrator es nominat per li C.D. Lor activitá es subordinat al decisiones de ti-ci. Li du oficies posse esser cumulabil. Li precie del abonnament es fixat per li administrator in consense con li C.D. Li modalitás del interactiones financiari (payament del abonnament a Cosmoglotta e del contributiones membral) es fixat per special regulament.
- 9. Li Académie de Interlingue es li suprem instantie lingual del IU. It consiste ex un president, un secretario e admaxim 3 altri membres. It decide pri omni questiones relatent li fixation del lingue e su decisiones es autoritativ por omni membres del IU. Li membres del Academie es electet per votation general e li gremie es renovat per cooptation. Li redactor de Cosmoglotta es de jure membre del Academie. Li membritá in li C.D. e Academie es cumulabil.
- 10. Li dissolution del IU es subordinat al aprobation del 2/3 de su membres. Li C.D. decide pri li proprietá del IU.
- 11. Omni decisiones, sive del C.D., sive del IU, concernent un eventual change de scope del IU deve esser considerat legalmen null.