Hans Homolka
Li Dr. Hans A. Homolka, esset un occidentalist austrian, presidente del Occidental-Union in Austria[1].
In li Unesim Austrian Occidental-Conferentie, quel evenit li 9-14 april 1936 in li Hotel « zum Auge Gottes » in Wien[2], il parlat pri Pro quo Occidental? - Principal punctus del interlinguistic problema in li introduction al reuniones del 10 april (public propaganda-vésper)[2]. Li referente exposit pro quo ni un mort lingue quam Latin, ni un vivent national lingue quam Anglés, ni un artificial lingue con desfigurat parol-images quam Esperanto posse servir quam standard-lingue in scientie e tecnica o quam auxiliari lingue in comercie e trafic. Il demonstrat per convictiv argumentes li ínsuficentie del aprioristic principies, queles misductet (precipue per li grotesc exageration de un purmen schematic « facilitá ») li anteyan « lingue-fabricantes » al construction de ínnatural e ínpopulari projectes. In sam témpor il pruvat que Occidental es nullmen un artificial idioma ma in contra un natural lingue regularisat, natural in su vocabularium de ínmutilat international paroles, e regularisat pro su modern analitic minimal-grammatica, quel es scientificmen íncontestabil e aprensibil in quasi un hor. Un textu in Occidental, presentat al interessat auditoria, trovat plen aprobation. On constatat unanimmen li ínmediat comprensibiliá de Occidental e nequi del audientes dubitat, que li referente havet rason con conclusion, que Occidental, comprensibil a 300 million civilisat homes sin anteriori studie, es pro su lingual e cultural qualitás predestinat devenir li standard-lingue del international scientie, tecnica e trafic.
Il representat Occidental in li interlinguistic conferentie in Paris, u il "exposit li psichologic o normativ principies de Occidental"[3].
In li conferentie del Occidental—Club Progress de Wien, quel evenit in Café Meller, Kaiserstrasse 56, Wien VII, il presentat li 12 februar "Latin - Anglés - Occidental"[2].
In 1938, il recivet li diploma de docente, acordat del Occidental-Academie[4].
Con li arrivation del nazisme, il comensat esser vigilat del Gestapo[5]
Il devenit vice presidente del Occidental-Union in 1949[6]