International Auxiliary Language Association
International Auxiliary Language Association (IALA) esset un organisation in li Unit States de America por explorar scientificmen li ommi questiones relatet al adoption de un international auxiliari lingue. Li IALA esset fundat in li annu 1924 e cessat su activitá in li annu 1953.
Li International Auxiliary Language Association esset fundat e financet de Alice Vanderbilt Morris, qui originat de un rich familie in li USA. Ella esset li marita de David Hennen Morris, qui esset inter 1933 e 1937 ambassador del Unit States de America in Belgia.
In prim li International Auxialiary Association studiat li existent international auxiliari lingues quam Esperanto, Esperanto II, Ido, Occidental e Novial. On volet trovar un scientific base por li selection de un international auxiliari lingue e fusionar li existent planlingues. Li IALA organisat inter 1930 e 1948 pluri international conferentias. Anc Edgar de Wahl partiprendet in conferentias de IALA.
In li annu 1934 li International Auxiliari Language Association decidet crear un propri international auxiliari lingue. Li resultate esset li planlingue Interlingua, quel esset publicat de Alexander Gode in li annu 1951.
In prim li sede del IALA esset in Liverpool, ma pro li Duesim Guerre Mundal it translocat in li annu 1939 a New York. Inter 1946 e 1948 li francesi linguist Andre Martinet esset li director del International Auxiliary Language Association. Alice Vanderbilt Morris morit in li annu 1950 e su heredantes ne volet plu financar li organisation. Sur li base del labor del IALA Alexander Gode publicat in li annu 1951 li planlingue Interlingua.