Canta li colera, o deessa, de Achilles, li filio de Peleus, destructiv colera quel causat ínexplicabil dolores al acheos, e inviat al Hades mult corageosi vives de heróes, e a ili self les fat predas por canes e avies predatori; talmen li dessine de Zeus acompleet, desde li témpor quande separat se pos un dispute li filio de Atreus, rey de li mannes, e li eclatant Achilles. Que deo esset qui promovet li dispute e li lucta inter ili? Li filio de Leto e Zeus. Il inviat un peste a su armé e lor guerreros morit, proque li filio de Atreus hat deshonorat a Crises, su sacerdote.
