Li Filosofie (fro li grec φιλοσοφία, philosophia, "amor de saventie") es un discipline scientific quel studia qualmen on deve viver e queles es li principies del rason e del conossentie.

Questiones filosofic classic include: "Es it possibil conosser omnicos?" e, si it es possibil, "Esque on posse demonstrar it?". Li filosofes anc posi questiones plu practic e concret quam "Esque it hay un optim forma de viver?".

Historicmen, li filosofie ha includet omni formes de conossentie. Desde li ancian filosof grec Aristoteles til li secul 19, li "filosofie natural" includet astronomie, medicina, e fisica. Per exemple, li libre de Newton Principies matematic de filosofie natural (publicat in 1687) esset classificat plu tarde quam un libre de fisica.

In li secul 19, li crescentie de universitás modern de resercha fat que li filosofie academic devenit plu specialisat e professionalisat. In li epoca modern, alcun reserchas quel esset traditionalmen parte del filosofie ha devenit disciplines academic índependent, includente psicologie, sociologie, linguistica e economie. Altri reserchas relatet con arte, scientie, politica e altri occupationes remanet parte de filosofie. Per exemple, "es bellitá subjectiv o objective?"

Li subcampes principal del filosofie academic include metafisica, quel es concernet con li natura fundamental del existentie e li realitá; epistemologie, quel studia li natura del conossentie e credentie; etica, quel es concernet con valores moral; e logica, quel studia li regulas de inferentie queles permette deducter conclusiones ex premisses ver. Altri subcampes notabil include li filosofie del scientie, filosofie politic, estetica, filosofie del lingue e filosofie del mente.